Velgengi erlendis.

Ég hef alltaf mjög gaman að því þegar Íslendingar eru að gera það gott erlendis og í þessu tilviki er mér efnið hugleikið.

Svo ég nappaði þessari grein af Vísi.is/Fréttablaðinu um hið hógværa og duglega tónskáld Atla Örvarsson, en hann er að ná stórmerkilegum árangri í sínu fagi.

Atli Örvars önnum kafinn í Hollywood

  Atli Örvarsson hefur nóg fyrir stafni í Hollywood því á árinu verða frumsýndar þrjár kvikmyndir þar sem tónlist hans fær að hljóma.

Hróður Atla Örvarssonar tónskálds virðist aukast með hverjum degi í draumaverksmiðjunni Hollywood. Eins og fram hefur komið í Fréttablaðinu samdi hann nýlega tónlist við hasarmyndina Babylon A.D. með Vin Diesel í aðalhlutverki og ofan á það bættist kvikmyndin The Code þar sem stórleikararnir Antonio Banderas og Morgan Freeman verða í helstu hlutverkum.

Á vefsíðu IMDB var í gær tilkynnt um nýtt verkefni Atla en það er Whiteout með ofurstjörnunni Kate Beckinsale og gamla brýninu Tom Skerrit í aðalhlutverkum. Ráðgert er að þessar þrjár myndir verði allar frumsýndar á þessu ári og ef það verður að veruleika er það einstakt afrek hjá íslensku tónskáldi.

Whiteout segir frá lögreglukonu sem er á höttunum eftir raðmorðingja í Alaska og þarf helst að finna kauða áður en sólin leggst í vetrarhýði næstu sex mánuði. Atli ætti að þekkja vel til drungans og myrkursins sem umlykur bandaríska fylkið enda að norðan en þar geta veturnir oft orðið æði kaldir og dimmir.

Á kvikmyndasíðunni kemur fram að áætlað er að kvikmyndin verði frumsýnd í október á þessu ári. Leikstjóri er Dominic Sena, sá hinn sami og gerði Gone in Sixty Seconds og Swordfish.

 

Poland-Ísland

Ferðasaga og hugleiðingar.

Klukkan var rúmlega átta á mánudagsmorgni þegar farsíminn minn hringdi.

Góðan dag,(maðurinn kynnti sig) er þetta Finnur Bjarki? Já, svaraði ég og bauð góðan dag á móti.

Mig vantar Kokk til að fara með nokkrum körlum til Póllands að sækja skip og sigla því til Íslands, við leggjum af stað í fyrramálið 5-6 daga ferð! Kemstu með?

Eitthvað í þessa áttina, stutt og laggott hljómaði símtalið frá útgerðarmanninum.

Ég var svo sem ekki lengi að hugsa mig um, hafði ekki komið til Póllands. Ég hef kynnst mikið af Pólsku fólki undanfarin ár og hef lengi haft áhuga á að skoða landið.

Það stóð til að fljúga út á þriðjudegi til Gdansk og sigla skipinu frá Gdynia á miðvikudegi svo landkönnun var nú ekki beint í kortunum.

Svo óheppilega vildi til við vorum varla komnir út fyrir hafnargarðinn þegar upp kom vélarbilun með viðeigandi hávaða (Túrbínan farinn). Við komumst þó til baka inn í höfnina eftir miðnætti, þá var kominn fimmtudagurinn 1. Maí. Frídagur verkamanna er virtur í Pólandi og flestir eru í fríi á föstudeginum líka þar sem annar helgur frídagur í Pólandi ber upp þann 3. Maí (því miður hef ég ekki náð mér í nánari upplýsingar varðandi þennan frídag). 

Upphófst nokkuð sérkennilegt tímastríð til að ná í varahluti og koma skipinu í lag með nokkrum skondnum uppákomum, kannski of mörgum milliliðum og amk fjórum tungumálum, flækjunni lauk svo á þriðjudegi þegar við lögðum af stað heim á leið.

En ég ætla aðeins að segja frá því sem fyrir augu bar á meðan við biðum eftir varahlutum (í frjálslegri tímaröð).

Gdynia, Sopot og Gdansk eru saman kallaðar Tri-City, á svæðinu búa um 1. milljón manna. Okkar skip Sóley Sigurjóns lá í höfninni í Gdynia sem er yngst þessara borga. Sopot er afskaplega falleg og mikil ferðamannaborg með glæsilegri strönd, hinar tvær eru hinsvegar meiri hafnarborgir og iðnaðarsvæði.

Gamli tíminn er á undanhaldi og verðlag orðið svipað og hérlendis, það er þó ennþá lægra matarverð og góð veitingahús mun ódýrari en hér heima. Þau veitingahús sem við fórum á eru verulega góð á allan hátt.

Enska er þó ekki á allra vörum en það gerði dvölina bara skemmtilegri, strákarnir sem voru með mér höfðu allir komið þarna áður og gátu sagt mér hversu stórstigar breytingarnar hafa verið á aðeins einum áratug.

Þrátt fyrir örar breytingar þá sýnist mér Pólverjar mun skynsamari en við þegar kemur að uppbyggingu framtíðarinnar! Þarna sá ég áberandi virðingu fyrir borgarskipulagi og því skipulagi sem fyrir er.

Ný verslunarmiðstöð eldri hluta Gdansk er hlaðinn með múrsteinum líkt og eldri byggingarnar í Old-City sem er stórglæsileg með mikið aðdráttarafl og alvöru götumyndum.

Nýrri byggingar eru líka mjög smekklegar og falla vel að umhverfinu.

Í Sopot er mikil uppbygging við aðal ferðamannasvæðið og þar er öllum byggingum haldið í frekar lágreistum stíl og vinnusvæðin snyrtilegu þó að vinna sé í fullum gangi. Sopot er dýrust í verðlagi en áberandi falleg og heillandi borg á hraðri uppleið í vinsældum.  Þarna er iðandi mannlíf þrátt fyrir að ferðamanna tíminn sé ekki kominn í fullan gang.

Nýtt Sheraton Hótel í Sopot telur c.a. 6 hæðir ofan á jarðhæð og lætur ekki mikið yfir sér en er falleg bygging og í stíl við eldri byggingar á svæðinu.

Ég var með ranghugmyndir um Pólland sem ferðamannaland en greinilegt er að gestrisnin er mikil.

Okkur var boðið til kvöldverðar á vegum skipasmíða verktakans á 5 stjörnu 17. aldar sveitahótelinu Dwor Oliwski. Einhver glæsilegasti kvöldverður sem ég hef tekið þátt í og staðurinn ævintýralega fallegur.

Ég fer aftur til Póllands það er á hreinu og þá langar mig að sjá miklu meira af landinu og því sem þessi merkilega þjóð hefur uppá að bjóða.

Siglingin heim gekk vel eftir viðgerðina og skipið  fékk mjúka meðferð alla leið þar til djöflaeyjan var í augsýn þá fengum við meinlausa en hefðbundna Íslenska brælu síðasta spölinn. Fyrstur til að kalla okkur upp var skipstjórinn á Vestmanney þar sem Simmi vinur minn er um borð. 

 

 

 

 

 

 5-6 dagar urðu 13. og ný Sóley Sigurjóns fékk að sjálfsögðu glæsilegar móttökur í heimahöfn.

 

 

Athyglisverð myndbönd!

Við gerum eins og okkur er sagt! Er það ekki? 

 

Meðferð manna!

 Alltaf gaman að samsæris-kenningum þessi er góð (svipað og að gefa þeim efnuðu frí frá fjármagnstekju-skattinum! )

 

 Og svo dýra!

 Ég held því miður að margt fólk hljóti ekkert betri meðferð en þessi dýr víða um heim!

Lausaganga Búfjár

Á þjóðvegi 1 rétt austan við Þjórsá varð fyrir skömmu ömurlegt slys þegar ekið var á hross sem stóð á Þjóðveginum með þeim afleiðingum að hrossið dó, bíllinn ónýtur (Hyunday Starex) og mikil mildi að bílstjóri og unglingur sluppu með eymsli að því er virðist, og andlegt áfall.

Þetta gerðist seint um kvöld og í ljós kom að þarna var ekki einn hestur á ferð heldur hrossastóð en þessi eini stóð á veginum og varð fyrir bílnum.

Þar sem þetta tengist mér mjög þá ætla ég ekki að fella dóm hér en langar að fá viðbrögð við þeim svörum sem fengust þegar réttar vegna trygginga var leitað.

Svar Lögreglu og Sveitarstjóra er að lausaganga Búfjár er leyfilega á þjóðvegi 1. á viðkomandi vegarkafla og það sé ákvörðun viðkomandi Sveitarfélags hverju sinni.

Í vegalögum sem tóku gildi 1. Janúar 2008 stendur hinsvegar:  

50. gr. Lausaganga búfjár.
Lausaganga búfjár á stofnvegum og tengivegum þar sem girt er báðum megin vegar og lokað er fyrir ágangi búfjár, t.d. með ristarhliði, er bönnuð. 

Sem á við í þessu tilfelli, en þrátt fyrir það er búfénaður sagður í rétti og enginn viðurlög við banninu!

Hvort sem Vegagerðin eða Sveitarfélögin hafi ákvörðunarvald um að heimila lausagöngu á Þjóðvegi 1. Þá held ég að réttmæt krafa sé að viðkomandi vegarkafli þar sem lausaganga búfjár er leyfileg,  beri merkingar þar um!

Ég var ekki í viðkomandi bíl, en hef verið vegfarandi um þennan veg nokkuð reglulega frá fæðingu.

Kominn heim...

Þá er hann mættur aftur, í bili amk. Hef verið um borð á frystitogara að þvælast um miðinn síðustu 35 daga. Góður túr og góður mórall um borð. Það eru tvö ár frá því að ég var síðast á sjó. það er mikil keppni í svona vinnu þetta snýst náttúrulega um að koma aflanum ferskum og snyrtum í frost á stuttum tíma og allra hagur að það gangi sem best fyrir sig. Svo að liðsheildin á vaktinni skiptir miklu máli, vaktformaðurinn minn hann Dabbi var ánægður með liðið sitt enda var þetta met-túr á togaranum Baldvin Njálssyni.

Annars átti RÚV mikið í allri umræðu um borð. Það er mikil bylting fyrir sjómenn að sjá fréttir og dagskrá RÚV frá gervihnetti. Þetta sér þó bara skipstjórinn, Vélstjórarnir og önnur vaktin!

Hin vaktin er að vinna svo að það væri nú ekki vitlaust að fá endurteknar fréttirnar eins og Kastljósið í dagskrár lok, það hentar örugglega líka fyrir annað fólk í vaktavinnu.

Nú svo er það útvarpið sem var að gera suma brjálaða, á langbylgju er Rás 1 í öndvegi og á næturnar eru allar bestu sinfóníur heimsins spilaðar í gríð og erg til að hefja upp menningar andann einhversstaðar, ekki þó hjá Sjómönnum, held að menningin deyi alveg þegar skipt er í miðjum Íþróttafréttum yfir á Rás 1. En það virðist vera rétti tíminn hjá RÚV til að skipta milli stöðva.

Annars langar mig að lýsa yfir ánægju með baráttu Flutningabílstjóra!

Mér fannst Lögreglan bara hjákátleg og sorglegt að sjá hvernig þeir stóðu að verki nú síðast. Á nú að fara að berja niður allar skoðanir aðrar en ríkisins hér á landi líkt og í Kína og víðar?

Mér finnst gott að vita að það sé til hópur af kjörkuðu fólki sem lætur í sér heyra þegar því ofbíður.

En 200 manna her bjargar sjálfsagt öllu og gefur ríkinu frið til að gera í buxurnar án þess að kjósendur fái nokkru ráðið!

 

Frelsi - til hvers?

Frelsi er vandmeðfarið! 

Það vekur oft athygli mína hversu vel við erum að okkur um aðrar þjóðir og þeirra menningu, sérstaklega í samanburði við okkar einstaka og ágæta land. "Bezt í Heimi" Segir þar alla söguna.

Í einni spjallþrætunni sem ég las þá snérist þrætan að hluta til um Ingibjörgu Sólrúnu og hvers vegna hún bæri slæðu við heimsókn í Islams ríki. Sumum fannst þetta undirlægjuháttur, öðrum kurteisi við menningu viðkomandi lands, og ef ég bæti við þá gæti það líka verið vegna sólarinnar og öryggisráðstöfun.

Einhver sagði að "þetta fólk tekur ekki niður slæðuna þegar það kemur hingað til lands" eins og það sé  alger óvirðing!

Ég spyr: Er það óvirðing við okkur staðföstu frelsishetjurnar að gestir okkar taki ekki niður slæðu þegar komið er á skerið?

Hvað með þetta frelsi sem við státum okkur af?

Er þetta hentisemi frelsi, sem er ekki ætlað öllum nema með ákveðnum forsendum?

Vegna þjóðernis eða trúar erum við að ætla þeim að leika eftir okkar reglum...Vestrænum Frelsis reglum!!!

Þá er nefnilega við hæfi að banna viðkomandi að hafa slæðu og svipta af viðkomandi því val-frelsi!

Mig minnir að mér hafi verið kennt í barnæsku að þetta væri kallað tvöfeldni,rætni,illgirni,einelti eða eitthvað í þá átt.

Það má því sennilega kalla mig öfga frjálshyggjumann því að ég vill gjarnan sjá blandaðan heim af öllum þessum frábæru menningar fjölbreytileika, ef fólk vill blanda menningu eða kynþáttum þá er það þeirra val sem þýðir frelsi í mínum huga.

Þeir sem ekki vilja blandast á einn eða annan hátt hafa val líka og þar með sitt frelsi!

Klæðaburður á vesturlöndum er mjög frjáls, svo frjáls að jafnvel ég er orðinn þreyttur á allri þessari nekt og krefst þess að konan mín sofi í náttfötum, sem væri frelsis-svipting ef hún væri ekki svona glöð með það :) 

Mín skoðun er sú að við eigum að hjálpa innflytjendum að aðlagast okkar þjóðfélagsgerð án þess að taka frá þeim þeirra hefðir eða gera lítið úr þeirra uppruna.   

En svo eru líka til þeir sem vilja þvinga þeirra frelsi upp á aðra, frekar stórt dæmi er utanríkisstefna USA við flestar aðrar þjóðir! Þessi mikla frelsis þjóð sem ég dái svo mjög að öðru leiti.

Einstaklingar eru jafn hættulegir í frelsis þvingun.

Frelsi fyrir einn til að gera það sem honum sýnist er oft á tíðum frelsissvipting fyrir þann næsta. Nefnum t.d.  Barnaþrælkun og Vændi!  Frelsi er tvíeggja sverð!

Það er því miður oft þannig að við ætlumst til þess að gestir þessa lands geri eins og við í einu og öllu! Þá á ég við að gera eins og ÉG í einu og öllu!

Og verða fangar í frelsinu með mér!

 

 

 

 

Sunnudags játningar!

Er það ekki við hæfi á mánudegi að vitna smávegis í Sunnudags játningar?

Góða vinir mínir Shay Dillon, Paul Kraushaar og Tim Riley voru að leika sér aðeins og blúsa í Stúdíói þeirra hjóna Shay og Paul á Sunnudegi.

Stefnan er að fá þau til landsins til að spila og skoða landið í leiðinni!

Ég er svo heppinn að hafa kynnst þeim öllum nokkuð vel og Shay Dillon hefur m.a. sungið nokkur lög eftir mig, ákaflega næm og góð söngkona með frábæra túlkun á texta.

Ég veit að hún er í uppáhaldi hjá mörgum hér á landi. 

 

 

 

Tungumálakunnátta.

Ef ég öfunda einhvern! Þá er það helst vegna tungumálakunnáttu! 

Ég las á Vísi.is að aðstoðar maður Sir Alex Ferguson hjá Manchester United, Carlos Queiroz talar fimm tungumál.

Ég vissi reynda að hann talar mörg tungumál en þetta fékk mig til að hugsa aðeins um hvað það er mikils virði að tala fleiri en eitt tungumál.

Sjálfur tala ég bara móðurmálið og ensku án vandræða og kannski get ég bjargað mér í Dönsku og eitthvað í Þýsku en ekki mikið.

Alltaf verið heitur fyrir Spænskunámi, kann það helsta (að panta á barnum:), og fór reyndar í hálfan vetur að læra Kínversku (cantonese) sem var afskaplega skemmtilegt og jók einnig minn skilning á því hversu ólíkur og skemmtilegur menningararfur Asíu er samanborið við Vestræna menningu.

Ég var einhverntímann búinn að reikna það út að ef ég lærði Kínversku og Spænsku til viðbótar við Enskukunnáttuna (og Íslensku:-)

þá gæti ég tjáð mig við 98% jarðarbúa!!

Þá væri friðurinn úti

 

 

 

 

Síminn.....sparar tímann...!

Svona segir í gömlu lagi sem ég hef haldið uppá.

Nú hef ég verið að vinna í úrlausn til þess að faðir minn geti notað síma með raddstýringu eingöngu!

Hann er í þannig stöðu að hendurnar gagnast honum lítið, í bili amk..

Honum var færður GSM sími Nokia 6021 með bluetooth (blátönn:) sem átti að leysa þessi mál og gefa honum aukna möguleika á að halda sambandi við vini og fjölskyldu.

Hann á því að geta gefið símanum raddbendingar og hringt í þann sem hann langar til. 

Þetta hefur gengið hálf illa og Tæknideild símans í 800-7000 er ekki hæf til að hjálpa okkur með þetta og ég hef verið sendur í verslun þeirra í Ármúlanum eftir þau símtöl.

Ég bý um 100 km frá Reykjavík og hef gert mér tvær ferðir sérstaklega í þessum erindum. Í fyrsta símtali fékk ég þau svör að í verslun Símans væri fjöldinn allur af símum sem gerðu nákvæmlega þetta, stýrast með röddinni.

Ég spurði til að vera öruggur!! Alveg án þess að þrýsta á hnappa?

Já var svarið!!

Það er svo  mikið úrval að þú verður bara að sjá það sjálfur! 

Í fyrra skiptið sem ég fór var mér kennt að taka upp röddina og festa hana við númerið, það var að líða að lokun svo að stúlkan, þó kurteis væri var greinilega að flýta sér.

Síðan hóf ég tenór æfingar á símanum til að láta hann svara mér því að þetta var ekki svo flókið eftir allt saman!

En viti menn síminn var algjörlega heyrnarlaus og sýndi enginn viðbrögð.

Ég fór því á netið inn á Nokia.com og náði mér í upplýsingar um tegundina.

Það vantaði ekkert um hvað þessi síma er magnaður og möguleikarnir endalausir. Það vantaði bara eitt! Leiðbeiningar um hvernig ætti að láta alla þessa dýrð virka.

Þá var komið að síðari ferðinni í Ármúlann. Stúlkan fór með símann á bak við í "Sérfræðingaherbergið" og þeir fundu út að það væri takki eins og á Labb-Rabb talstöðvum sem þyrfti að þrýsta á og SVO AÐ TALA VIÐ SÍMANN SJÁLFAN !

Sem sagt niðurstaðan lá fyrir, Þeir eiga ekki til síma sem svarar með raddstýringu einni saman, með þau svör fór ég út.

Ég á erfitt með að trúa þessu miðað við tæknina í dag, en ég er búinn að gefast upp á Símanum ehf.

Það er búið ljúga að manni að þeir eigi hlutina til og svo er enginn áhugi á að leysa málið!

Það er ekki nóg að setja sjálfan Jesú í auglýsingaherferð, kraftaverkinn fylgja greinilega ekki með!

 
Þegar ég hringdi á Hátækni til að tala við sölumann þar sem ég kannast við, þá hringdi hann aldrei til baka þrátt fyrir þrenn skilaboð til hans, svo að ekki var þjónustan betri þar þrátt fyrir kunningsskap.

Það má þó hrósa þeim fyrir að mismuna ekki fólki vegna tengsla! 

Ef einhver veit betur og getur komið mér til aðstoðar þá er það vel þegið! 

Allveg mögnuð!!

Það er engu við þessa yfirlýsingu að bæta.

Björk er einfaldlega hafin yfir Stjórnmál.

Allir eiga sjálfstæði skilið! 

Yfirlýsing frá Björk